1
0
धुळे : विधानसभा निवडणुकीच्या पार्श्वभूमीवर धुळ्यात मोठा प्रकार उघडकीस आला आहे. २० नोव्हेंबर रोजी मतदान प्रक्रियेच्या पूर्वसंध्येला धुळे जिल्ह्यातील थाळनेर पोलीस स्टेशनच्या हद्दीत पोलिसांनी पहाटे एक संशयास्पद कंटेनर अडवला. तपासणीदरम्यान, या कंटेनरमध्ये चांदीच्या विटा सापडल्या. सुमारे १०,००० किलो वजनाच्या या चांदीची किंमत तब्बल ९४ कोटी ६८ लाख रुपये असल्याचे सांगितले जात आहे.
कायदेशीर व्यवहार असल्याचा दावा
या कंटेनरविषयी प्राथमिक तपासात समोर आले आहे की, चांदी चेन्नईहून जयपूरकडे नेली जात होती. सर्व चांदी एचडीएफसी बँकेची असल्याचा प्राथमिक अंदाज आहे. त्यामुळे पोलिसांनी चांदी जप्त केली नसून, तिची कागदपत्रांच्या आधारे तपासणी केली जात आहे.
बँक अधिकाऱ्यांशी संपर्क
पोलिसांनी एचडीएफसी बँकेच्या संबंधित अधिकाऱ्यांशी संपर्क साधण्याचा प्रयत्न केला असून, कागदपत्रांची पडताळणी सुरू आहे. अद्याप ही चांदी कायदेशीर मार्गाने नेली जात होती का, याबाबत पोलिसांनी दुजोरा दिलेला नाही.
सतर्क पोलिसांची भूमिका
चांदीसंबंधित व्हिडीओ सोशल मीडियावर व्हायरल झाल्यानंतर या घटनेची जोरदार चर्चा सुरू आहे. निवडणुकीच्या काळात गैरव्यवहार टाळण्यासाठी पोलिसांनी केलेली ही कारवाई महत्त्वाची मानली जात आहे. अंतिम तपासणीनंतर पुढील कारवाईचा निर्णय घेतला जाणार आहे.
यावर पुढील माहिती मिळेपर्यंत ही घटना जिल्ह्यातील चर्चेचा विषय ठरली आहे.
