
पुणे – नागपूर हिवाळी अधिवेशन संपल्यानंतर चिंचवडचे आमदार शंकर जगताप यांनी चिंचवड विधानसभा मतदारसंघातील प्रलंबित विकास प्रकल्प आणि नागरिकांच्या मूलभूत सुविधांवरील अडचणी सोडवण्यासाठी त्यांनी गुरुवारी पिंपरी-चिंचवड महानगरपालिका आयुक्त व प्रशासक शेखर सिंह यांच्या समवेत महत्त्वपूर्ण बैठक घेतली. या बैठकीला मतदारसंघातील माजी नगरसेवक मोठ्या संख्येने उपस्थित होते.
आमदार झाल्यानंतर पहिल्याच नागपूर हिवाळी अधिवेशनात जगताप यांनी निळ्या पूररेषेतील बांधकामे, वाहतूक समस्या आणि मतदारसंघातील इतर महत्त्वाच्या मुद्द्यांवर आवाज उठवत प्रभावी भूमिका बजावली. अधिवेशनानंतरही त्यांनी मतदारसंघात प्रत्यक्ष येऊन अधिकाऱ्यांना आदेश दिले आणि विकासकामांना गती दिली.
बैठकीतील महत्त्वाचे मुद्दे
कचरा व्यवस्थापन व स्वच्छता:
शहरातील कचऱ्याचे प्रभावी व्यवस्थापन व नियमित स्वच्छतेसाठी उपाययोजना करण्यावर भर.
पाणीपुरवठा व विद्युत समस्या:
कमी दाबाने होणारा पाणीपुरवठा व वारंवार होणाऱ्या वीज खंडितीवर त्वरित उपाययोजना.
वाहतूक कोंडी व रस्ते सुधारणा:
वाहतूक कोंडी कमी करण्यासाठी नवीन प्रकल्पांना प्राधान्य.
फुटपाथवरील अतिक्रमण:
पादचाऱ्यांसाठी अतिक्रमण हटवून फुटपाथचे सुधारित व्यवस्थापन.
महत्त्वाचे प्रकल्प व निर्णय
बटरफ्लाय ब्रिज प्रकल्प: रखडलेला प्रकल्प तातडीने पूर्ण करण्याचे निर्देश.
पिंपळे सौदागरचा जुना पूल: काम तातडीने सुरू करण्याची सूचना.
वाकड दत्त मंदिर रस्ता: प्रलंबित काम गतीने पूर्ण करण्यावर भर.
शाफ्ट तंत्रज्ञानाचा वापर: पाणीपुरवठा सुधारण्यासाठी आयआयटीच्या तंत्रज्ञानाचा वापर.
इतर निर्णय
मोकाट कुत्र्यांवर प्रभावी नियंत्रणासाठी उपाययोजना.
बेकायदेशीर नळ कनेक्शनवर कठोर कारवाई.
स्थापत्य, ड्रेनेज व पाणीपुरवठा विभागांसाठी पुरेसे बजेट.
या बैठकीत प्रशासन व लोकप्रतिनिधींनी प्रलंबित विकासकामांना गती देण्यासाठी सक्रिय भूमिका घेण्याचा निर्धार व्यक्त केला. यामुळे चिंचवड मतदारसंघातील नागरिकांना अद्ययावत आणि मूलभूत सुविधा लवकरच उपलब्ध होतील, असा विश्वास व्यक्त केला जात आहे.